Odorico Politi (Durì Politi par furlan, Udin, 1785 - Vignesie 1846) al fo un pitôr furlan.
Al nâs a Udin, ma la sô famee e je origjinarie di Clausêt. Al impare il mistîr di pitôr te buteghe dal abât e pitôr Giovanni Battista Tosolini. Intal 1806, a vincjeun agns, al va a Vignesie inte "Scuele dai Pitôrs". L'an dopo, al studie te Gnove Academie di Bielis Arts, nassude par volê di Napoleon Bonaparte.
Inte Academie di Vignesie, al studie cun Francesco Hayez e Giovanni de Min. Al torne a Udin intal 1812 e al scomence la sô cariere di pitôr. Jenfri il 1813 e il 1818, al scomence, par plui voltis, i frescs a sogjet storic e mitologjic tâl Palaç de sô famee a Udin. Intal 1818, la famee Antonini lu clame par lis voris tal plan teren dal lôr palaç, che al dì di vuê e je la sêt de Bancje d'Italie.
Intal 1834, al lavore intai frescs dal Salon des Fiestis dal Palaç Reâl a Vignesie (cumò sede dal Museu Correr) Intal 1818 al vinç un concors de Academie di Brera a Milan cun il cuadri La lucerna di Assagora. Nol dismentee il so paîs di origjin, Clausêt, e intal 1824 al piture pe glesie di San Jacum, la pale di altâr San Zuan Batiste. Intal 1831, i ven conferide la catedre di piture de Academie di Vignesie. Intal 1835, al fâs une altre pale di altâr cun sogjet la Vergjine dal Rosari pe glesie parochiâl di Vît. Politi al fo ancje une vore atîf come pitôr ritratist.